ਮੋਹਾਲੀ ਦਾ VR Punjab ਮਾਲ ਬੰਦ ਹੋਣ ‘ਤੇ ਉੱਠੇ ਸਵਾਲ; ਭੂਚਾਲ ਕਾਰਨ ਇਮਾਰਤ ਅਸੁਰੱਖਿਅਤ ਜਾਂ ਫਿਰ…..

ਕਦੇ ਟ੍ਰਾਈਸਿਟੀ ਦਾ ਸਭ ਤੋਂ ਵੱਡਾ ਮਾਲ ਰਹੇ ਮੋਹਾਲੀ ਸਥਿਤ ਵੀਆਰ ਪੰਜਾਬ ਮਾਲ ਨੂੰ ਬੰਦ ਕਰਨ ‘ਤੇ ਹਜ਼ਾਰਾਂ ਤਰ੍ਹਾਂ ਦੇ ਸਵਾਲ ਉੱਠ ਰਹੇ ਹਨ। ਮਲਟੀਲੈਵਲ ਕੰਪਨੀਆਂ ਦੇ ਆਊਟਲੈੱਟਸ ਬੰਦ ਹੋਣ ਦੇ ਡਰੋਂ ਹਜ਼ਾਰਾਂ ਕਰਮਚਾਰੀਆਂ ਨੂੰ ਬੇਰੁਜ਼ਗਾਰ ਹੋਣ ਦੀ ਚਿੰਤਾ ਸਤਾਉਣ ਲੱਗੀ ਹੈ।ਮਾਲ ਪ੍ਰਬੰਧਕਾਂ ਨੇ ਭੂਚਾਲ ਕਾਰਨ ਇਮਾਰਤ ਨੂੰ ਖ਼ਤਰਾ ਹੋਣ ਦਾ ਤਰਕ ਦੇ ਕੇ ਮਾਲ ਨੂੰ ਬੰਦ ਕਰ ਦਿੱਤਾ ਹੈ, ਜਦਕਿ ਮਾਹਿਰਾਂ ਦਾ ਦਾਅਵਾ ਹੈ ਕਿ 3.5 ਤੋਂ 4.0 ਦੀ ਤੀਬਰਤਾ ਵਾਲੇ ਭੂਚਾਲ ਨਾਲ ਆਮ ਤੌਰ ‘ਤੇ ਕਿਸੇ ਮਜ਼ਬੂਤ ਅਤੇ ਆਧੁਨਿਕ ਇਮਾਰਤ ਨੂੰ ਗੰਭੀਰ ਢਾਂਚਾਗਤ ਨੁਕਸਾਨ ਨਹੀਂ ਹੁੰਦਾ।ਇਸੇ ਆਧਾਰ ‘ਤੇ ਵੀਆਰ ਪੰਜਾਬ ਮਾਲ ਨੂੰ ਬੰਦ ਕਰਨ ਦੇ ਫੈਸਲੇ ਨੇ ਹੁਣ ਵਿਵਾਦ ਦਾ ਰੂਪ ਲੈ ਲਿਆ ਹੈ। ਮਾਲ ਪ੍ਰਬੰਧਨ ਦੇ ਇਸ ਫੈਸਲੇ ਖ਼ਿਲਾਫ਼ ਅੰਦਰ ਚੱਲ ਰਹੀਆਂ ਵੱਖ-ਵੱਖ ਕੰਪਨੀਆਂ ਦੇ ਆਊਟਲੇਟ ਸੰਚਾਲਕਾਂ ਨੇ ਖੁੱਲ੍ਹ ਕੇ ਵਿਰੋਧ ਸ਼ੁਰੂ ਕਰ ਦਿੱਤਾ ਹੈ ਅਤੇ ਉਹ ਅਸਲੀ ਵਜ੍ਹਾ ਜਾਣਨਾ ਚਾਹੁੰਦੇ ਹਨ।ਜੇਕਰ ਇਮਾਰਤ ਸੱਚਮੁੱਚ ਅਸੁਰੱਖਿਅਤ ਹੁੰਦੀ ਤਾਂ ਤੁਰੰਤ ਕਾਰਵਾਈ ਹੁੰਦੀ

ਪ੍ਰਬੰਧਨ ਨੇ 20 ਅਪ੍ਰੈਲ ਤੋਂ ਮਾਲ ਬੰਦ ਕਰਨ ਦਾ ਫੈਸਲਾ ਲੈਂਦਿਆਂ 3 ਅਪ੍ਰੈਲ ਨੂੰ ਆਏ ਭੂਚਾਲ ਕਾਰਨ ਇਮਾਰਤ ਦੇ ਢਾਂਚੇ ਨੂੰ ਨੁਕਸਾਨ ਪਹੁੰਚਣ ਦਾ ਹਵਾਲਾ ਦਿੱਤਾ ਹੈ। ਆਊਟਲੇਟ ਸੰਚਾਲਕਾਂ ਨੇ ਇਸ ਦਾਅਵੇ ‘ਤੇ ਸਵਾਲ ਚੁੱਕੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਅਸਲ ਵਿੱਚ ਇਮਾਰਤ ਅਸੁਰੱਖਿਅਤ ਹੁੰਦੀ, ਤਾਂ ਕਾਰਵਾਈ ਤੁਰੰਤ ਕੀਤੀ ਜਾਂਦੀ, ਨਾ ਕਿ 15 ਦਿਨਾਂ ਬਾਅਦ ਅਚਾਨਕ ਨੋਟਿਸ ਜਾਰੀ ਕਰਕੇ ਮਾਲ ਬੰਦ ਕਰਨ ਦਾ ਹੁਕਮ ਦਿੱਤਾ ਜਾਂਦਾ।

ਆਊਟਲੇਟ ਸੰਚਾਲਕਾਂ ਅਨੁਸਾਰ, 18 ਅਪ੍ਰੈਲ ਨੂੰ ਨੋਟਿਸ ਜਾਰੀ ਕਰਕੇ 20 ਅਪ੍ਰੈਲ ਤੋਂ ਮਾਲ ਬੰਦ ਕਰਨ ਦਾ ਫੈਸਲਾ ਨਾ ਸਿਰਫ਼ ਜਲਦਬਾਜ਼ੀ ਵਿੱਚ ਲਿਆ ਗਿਆ ਹੈ, ਸਗੋਂ ਇਸ ਨਾਲ ਵਪਾਰੀਆਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਤਿਆਰੀ ਦਾ ਸਮਾਂ ਵੀ ਨਹੀਂ ਮਿਲਿਆ। ਉਨ੍ਹਾਂ ਦਾ ਦੋਸ਼ ਹੈ ਕਿ ਇਸ ਫੈਸਲੇ ਕਾਰਨ ਉਨ੍ਹਾਂ ਨੂੰ ਭਾਰੀ ਆਰਥਿਕ ਨੁਕਸਾਨ ਝੱਲਣਾ ਪੈ ਰਿਹਾ ਹੈ।

ਦਿਨ ਭਰ ਚੱਲੀਆਂ ਬੈਠਕਾਂ, ਪਰ ਸਿੱਟਾ ‘ਜ਼ੀਰੋ’

ਸੋਮਵਾਰ ਨੂੰ ਪੂਰਾ ਦਿਨ ਮਾਲ ਦੇ ਅੰਦਰ ਆਊਟਲੇਟ ਸੰਚਾਲਕਾਂ ਅਤੇ ਪ੍ਰਬੰਧਨ ਵਿਚਕਾਰ ਬੈਠਕਾਂ ਅਤੇ ਗੱਲਬਾਤ ਦਾ ਦੌਰ ਚੱਲਦਾ ਰਿਹਾ, ਪਰ ਦੇਰ ਸ਼ਾਮ ਤੱਕ ਕੋਈ ਠੋਸ ਹੱਲ ਸਾਹਮਣੇ ਨਹੀਂ ਆਇਆ। ਕਈ ਕੰਪਨੀਆਂ ਨੇ ਮਾਲ ਪ੍ਰਬੰਧਨ ਤੋਂ ਮੁਆਵਜ਼ੇ ਦੀ ਮੰਗ ਵੀ ਕੀਤੀ ਹੈ, ਜਦਕਿ ਕੁਝ ਨੇ ਆਪਣੇ ਕਾਨੂੰਨੀ ਸਲਾਹਕਾਰਾਂ ਰਾਹੀਂ ਮਾਮਲੇ ਨੂੰ ਅੱਗੇ ਵਧਾਉਣ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ।

“24 ਘੰਟਿਆਂ ਦੇ ਅੰਦਰ ਆਊਟਲੇਟ ਖਾਲੀ ਕਰਨ ਦਾ ਫੈਸਲਾ ਪੂਰੀ ਤਰ੍ਹਾਂ ਗਲਤ ਹੈ। ਇੰਨੇ ਘੱਟ ਸਮੇਂ ਵਿੱਚ ਕਿਸੇ ਵੀ ਕਾਰੋਬਾਰ ਨੂੰ ਸਮੇਟਣਾ ਸੰਭਵ ਨਹੀਂ ਹੁੰਦਾ। ਸਾਡੀ ਕੰਪਨੀ ਨੇ ਇੱਥੇ ਆਊਟਲੇਟ ਸਥਾਪਤ ਕਰਨ ਵਿੱਚ ਲੱਖਾਂ ਰੁਪਏ ਦਾ ਨਿਵੇਸ਼ ਕੀਤਾ ਹੈ—ਇੰਟੀਰੀਅਰ, ਮਸ਼ੀਨਰੀ, ਸਟਾਕ ਅਤੇ ਸਟਾਫ਼ ‘ਤੇ ਭਾਰੀ ਖਰਚ ਕੀਤਾ ਗਿਆ ਹੈ। ਇਸ ਦੇ ਬਾਵਜੂਦ ਪ੍ਰਬੰਧਨ ਨੇ ਮੁਆਵਜ਼ੇ ਦੇ ਸਬੰਧ ਵਿੱਚ ਕੋਈ ਜਾਣਕਾਰੀ ਜਾਂ ਭਰੋਸਾ ਨਹੀਂ ਦਿੱਤਾ ਹੈ, ਜੋ ਕਿ ਬਹੁਤ ਨਿਰਾਸ਼ਾਜਨਕ ਹੈ।”

• ਸੁਨੀਲ, ਰੀਜਨਲ ਮੈਨੇਜਰ, ਕੈਫੇ ਕੌਫੀ ਡੇ (CCD)

“ਸਾਡੇ ਆਊਟਲੇਟ ‘ਤੇ ਵਿਕਰੀ ਵਧੀਆ ਚੱਲ ਰਹੀ ਸੀ। ਅਜਿਹੇ ‘ਚ ਅਚਾਨਕ ਲਿਆ ਗਿਆ ਇਹ ਫੈਸਲਾ ਬਿਲਕੁਲ ਗਲਤ ਹੈ। ਮਾਲ ਪ੍ਰਬੰਧਨ ਨੂੰ ਘੱਟੋ-ਘੱਟ 15 ਦਿਨਾਂ ਦਾ ਅਲਟੀਮੇਟਮ ਦੇਣਾ ਚਾਹੀਦਾ ਸੀ, ਤਾਂ ਜੋ ਅਸੀਂ ਆਪਣੀ ਵਿਵਸਥਾ ਸੰਭਾਲ ਸਕਦੇ। ਫਿਲਹਾਲ ਕੰਪਨੀ ਦੇ ਸੀਨੀਅਰ ਅਧਿਕਾਰੀ ਇਸ ਮੁੱਦੇ ਨੂੰ ਲੈ ਕੇ ਮਾਲ ਪ੍ਰਬੰਧਨ ਨਾਲ ਗੱਲਬਾਤ ਕਰ ਰਹੇ ਹਨ।”

• ਅਜੇ ਕੁਮਾਰ, ਸਟੋਰ ਇੰਚਾਰਜ, ਕੋਸਟਾ ਕੌਫੀ

“ਅਚਾਨਕ ਲਏ ਗਏ ਇਸ ਫੈਸਲੇ ਨਾਲ ਸਾਡੀ ਨੌਕਰੀ ‘ਤੇ ਵੀ ਸੰਕਟ ਆ ਗਿਆ ਹੈ। ਕੰਪਨੀ ਤਾਂ ਮਾਲ ਪ੍ਰਬੰਧਨ ਨਾਲ ਆਪਣੀ ਵਿਵਸਥਾ ਕਰ ਹੀ ਲਵੇਗੀ, ਪਰ ਸਾਡੇ ਲਈ ਸਥਿਤੀ ਕਾਫੀ ਮੁਸ਼ਕਲ ਹੋ ਗਈ ਹੈ। ਹੁਣ ਸਾਨੂੰ ਇਹ ਵੀ ਨਹੀਂ ਪਤਾ ਕਿ ਕੰਪਨੀ ਸਾਨੂੰ ਕਿੱਥੇ ਟ੍ਰਾਂਸਫਰ ਕਰ ਦੇਵੇਗੀ। ਅਸੀਂ ਇੱਥੇ ਬੜੀ ਮੁਸ਼ਕਲ ਨਾਲ ਖੁਦ ਨੂੰ ਠੀਕ ਤਰ੍ਹਾਂ ਸਥਾਪਤ ਕਰ ਸਕੇ ਸੀ।”

• ਰਾਜਨ, ਸਟੋਰ ਇੰਚਾਰਜ, ਲੀਵਾਈਸ (Levi’s)

“ਸਾਨੂੰ ਆਪਣੀ ਨੌਕਰੀ ਦੀ ਚਿੰਤਾ ਸਤਾ ਰਹੀ ਹੈ। ਕੰਪਨੀ ਸਾਨੂੰ ਅੱਗੇ ਰੱਖੇਗੀ ਜਾਂ ਨਹੀਂ, ਇਹ ਵੀ ਅਜੇ ਸਪੱਸ਼ਟ ਨਹੀਂ ਹੈ। ਮਾਲ ਪ੍ਰਬੰਧਨ ਵੱਲੋਂ ਲਿਆ ਗਿਆ ਇਹ ਫੈਸਲਾ ਪੂਰੀ ਤਰ੍ਹਾਂ ਇੱਕਤਰਫਾ ਹੈ, ਜਿਸ ਵਿੱਚ ਕਰਮਚਾਰੀਆਂ ਅਤੇ ਦੁਕਾਨਦਾਰਾਂ ਦੇ ਹਿੱਤਾਂ ਬਾਰੇ ਬਿਲਕੁਲ ਨਹੀਂ ਸੋਚਿਆ ਗਿਆ।”