ਸੋਮਵਾਰ ਨੂੰ ਜਾਪਾਨ ਦੇ ਉੱਤਰ-ਪੂਰਬੀ ਤੱਟ ‘ਤੇ ਇੱਕ ਵੱਡਾ ਭੂਚਾਲ ਆਇਆ, ਜਿਸ ਕਾਰਨ ਤਿੰਨ ਮੀਟਰ ਤੱਕ ਸੁਨਾਮੀ ਦੀ ਚਿਤਾਵਨੀ ਦਿੱਤੀ ਗਈ। ਭੂਚਾਲ ਇੰਨੇ ਤੇਜ਼ ਸਨ ਕਿ ਉੱਤਰੀ ਅਤੇ ਪੂਰਬੀ ਜਾਪਾਨ ਵਿੱਚ ਵਿਆਪਕ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।ਜਾਪਾਨ ਮੌਸਮ ਵਿਗਿਆਨ ਏਜੰਸੀ ( ਜੇਐਮਏ) ਨੇ ਕਿਹਾ ਕਿ ਭੂਚਾਲ ਦੀ ਤੀਬਰਤਾ 7.6 ਮਾਪੀ ਗਈ। ਭੂਚਾਲ ਰਾਤ 11:15 ਵਜੇ (1415 GMT) ਆਇਆ । ਹੋੱਕਾਈਡੋ, ਅਓਮੋਰੀ ਅਤੇ ਇਵਾਤੇ ਪ੍ਰੀਫੈਕਚਰ ਲਈ ਸੁਨਾਮੀ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ।
ਭੂਚਾਲ ਦਾ ਕੇਂਦਰ ਅਓਮੋਰੀ ਦੇ ਤੱਟ ਤੋਂ ਲਗਪਗ 80 ਕਿਲੋਮੀਟਰ ਦੂਰ ਸੀ, ਅਤੇ ਇਸਦੀ ਡੂੰਘਾਈ 50 ਕਿਲੋਮੀਟਰ ਦੱਸੀ ਗਈ ਸੀ। ਏਜੰਸੀ ਨੇ ਸ਼ੁਰੂ ਵਿੱਚ 7.2 ਦੀ ਤੀਬਰਤਾ ਦੱਸੀ ਸੀ, ਪਰ ਬਾਅਦ ਵਿੱਚ ਇਸਨੂੰ ਸੋਧ ਕੇ 7.6 ਕਰ ਦਿੱਤਾ।
ਫਿਲੀਪੀਨਜ਼ ਨੂੰ ਕੋਈ ਖ਼ਤਰਾ ਨਹੀਂ
ਫਿਲੀਪੀਨਜ਼ ਦੀ ਭੂਚਾਲ ਨਿਗਰਾਨੀ ਏਜੰਸੀ, ਫਿਵੋਲਕਸ ਨੇ ਕਿਹਾ ਕਿ ਭੂਚਾਲ ਨਾਲ ਫਿਲੀਪੀਨਜ਼ ਨੂੰ ਸੁਨਾਮੀ ਦਾ ਕੋਈ ਖ਼ਤਰਾ ਨਹੀਂ ਹੈ। ਫਿਵੋਲਕਸ ਨੇ ਭੂਚਾਲ ਦੀ ਤੀਬਰਤਾ 7.6 ਦਰਜ ਕੀਤੀ ਅਤੇ ਦੱਸਿਆ ਕਿ ਭੂਚਾਲ ਰਾਤ 10:15 ਵਜੇ (ਫਿਲੀਪੀਨਜ਼ ਦੇ ਸਮੇਂ) ਮਹਿਸੂਸ ਕੀਤਾ ਗਿਆ। ਡੂੰਘਾਈ ਲਗਭਗ 51 ਕਿਲੋਮੀਟਰ ਮਾਪੀ ਗਈ। ਯੂਐਸਜੀਐਸ ਨੇ ਵੀ ਭੂਚਾਲ ਦੀ ਤੀਬਰਤਾ 7.6 ਦਰਜ ਕੀਤੀ।
