ਇਰਾਨ ਵਿੱਚ ਯੁੱਧ ਖ਼ਤਮ ਕਰਨ ਬਾਰੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਟਿੱਪਣੀ ਦਾ ਜਵਾਬ ਦਿੰਦਿਆਂ ਤੇਹਰਾਨ ਨੇ ਕਿਹਾ ਹੈ ਕਿ ਯੁੱਧ ਕਦੋਂ ਖ਼ਤਮ ਕਰਨਾ ਹੈ, ਇਹ ਉਹ ਖ਼ੁਦ ਤੈਅ ਕਰੇਗਾ।ਇਰਾਨ ਦੀ ਇਸਲਾਮਿਕ ਰਿਵੋਲਿਊਸ਼ਨਰੀ ਗਾਰਡ ਕਾਰਪਸ (IRGC) ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਸ ਖੇਤਰ ਦੇ ਸਮੀਕਰਨ ਅਤੇ ਭਵਿੱਖ ਦੀ ਸਥਿਤੀ ਹੁਣ ਤੇਹਰਾਨ ਦੀਆਂ ਫ਼ੌਜਾਂ ਦੇ ਹੱਥ ਵਿੱਚ ਹੈ। ਇਸ ਤੋਂ ਪਹਿਲਾਂ ਟਰੰਪ ਨੇ ਕਿਹਾ ਸੀ ਕਿ ਇਰਾਨ ਵਿੱਚ ਲੜਾਈ ਜਲਦੀ ਖ਼ਤਮ ਹੋ ਜਾਵੇਗੀ।ਇਰਾਨ ਨੇ ਕੀ ਕਿਹਾ?
IRGC ਨੇ ਕਿਹਾ, “ਅਸੀਂ ਹੀ ਯੁੱਧ ਦਾ ਅੰਤ ਤੈਅ ਕਰਾਂਗੇ। ਇਸ ਇਲਾਕੇ ਦੇ ਸਮੀਕਰਨ ਅਤੇ ਭਵਿੱਖ ਦੀ ਸਥਿਤੀ ਹੁਣ ਸਾਡੀ ਫ਼ੌਜ ਦੇ ਹੱਥਾਂ ਵਿੱਚ ਹੈ, ਅਮਰੀਕੀ ਫ਼ੌਜ ਯੁੱਧ ਖ਼ਤਮ ਨਹੀਂ ਕਰੇਗੀ।”
ਟਰੰਪ ਨੇ ਕੀ ਕਿਹਾ ਸੀ?
ਟਰੰਪ ਨੇ ਕਿਹਾ ਹੈ ਕਿ ਇਰਾਨ ਵਿਰੁੱਧ ਯੁੱਧ ਘੱਟ ਸਮੇਂ ਦਾ ਹੋ ਸਕਦਾ ਹੈ, ਪਰ ਉਨ੍ਹਾਂ ਨੇ ਇਸ ਗੱਲ ਵੱਲ ਵੀ ਇਸ਼ਾਰਾ ਕੀਤਾ ਹੈ ਕਿ ਜੇਕਰ ਇਸਲਾਮਿਕ ਰਿਪਬਲਿਕ (ਇਰਾਨ) ਗਲੋਬਲ ਤੇਲ ਸਪਲਾਈ ਵਿੱਚ ਰੁਕਾਵਟ ਪਾਉਂਦਾ ਹੈ ਤਾਂ ਲੜਾਈ ਵਧ ਸਕਦੀ ਹੈ।
ਟਰੰਪ ਨੇ ਮਿਆਮੀ ਦੇ ਕੋਲ ਆਪਣੇ ਗੋਲਫ਼ ਕਲੱਬ ਵਿੱਚ ਰਿਪਬਲਿਕਨ ਸਾਂਸਦਾਂ ਨੂੰ ਕਿਹਾ, “ਅਸੀਂ ਕੁਝ ਬੁਰਾਈਆਂ ਤੋਂ ਛੁਟਕਾਰਾ ਪਾਉਣ ਲਈ ਮਿਡਲ ਈਸਟ ਦਾ ਇੱਕ ਛੋਟਾ ਜਿਹਾ ਦੌਰਾ ਕੀਤਾ। ਅਤੇ ਮੈਨੂੰ ਲੱਗਦਾ ਹੈ ਕਿ ਤੁਸੀਂ ਦੇਖੋਗੇ ਕਿ ਇਹ ਇੱਕ ਛੋਟਾ ਜਿਹਾ ਦੌਰਾ ਹੋਵੇਗਾ।”
ਇਸ ਦੇ ਕੁਝ ਘੰਟਿਆਂ ਬਾਅਦ ਹੀ ਅਮਰੀਕੀ ਕਮਾਂਡਰ-ਇਨ-ਚੀਫ਼ ਨੇ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤਾ, “ਜੇਕਰ ਇਰਾਨ ਅਜਿਹਾ ਕੁਝ ਕਰਦਾ ਹੈ ਜਿਸ ਨਾਲ ਹੋਰਮੁਜ਼ ਸਟ੍ਰੇਟ (Strait of Hormuz) ਵਿੱਚ ਤੇਲ ਦਾ ਵਹਾਅ ਰੁਕ ਜਾਂਦਾ ਹੈ, ਤਾਂ ਅਮਰੀਕਾ ਉਨ੍ਹਾਂ ‘ਤੇ ਹੁਣ ਤੱਕ ਹੋਏ ਹਮਲਿਆਂ ਨਾਲੋਂ ਵੀਹ ਗੁਣਾ ਜ਼ਿਆਦਾ ਜ਼ੋਰਦਾਰ ਹਮਲਾ ਕਰੇਗਾ।”
