ਪੱਛਮੀ ਜਾਪਾਨ ਵਿੱਚ ਆਏ ਲੜੀਵਾਰ ਭੂਚਾਲਾਂ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 57 ਹੋ ਗਈ ਹੈ, ਕਈ ਇਮਾਰਤਾਂ, ਵਾਹਨਾਂ, ਕਿਸ਼ਤੀਆਂ ਅਤੇ ਸੜਕਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਭੂਚਾਲ ਦੇ ਖ਼ਤਰੇ ਦੇ ਮੱਦੇਨਜ਼ਰ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਵੀ ਚੇਤਾਵਨੀ ਜਾਰੀ ਕੀਤੀ ਅਤੇ ਕੁਝ ਇਲਾਕਿਆਂ ਦੇ ਲੋਕਾਂ ਨੂੰ ਘਰਾਂ ਤੋਂ ਦੂਰ ਰਹਿਣ ਲਈ ਕਿਹਾ। 7.6 ਤੀਬਰਤਾ ਦਾ ਭੂਚਾਲ, ਜੋ ਕਿ ਸਭ ਤੋਂ ਵੱਡਾ ਸੀ, ਸੋਮਵਾਰ ਨੂੰ ਇਸ਼ੀਕਾਵਾ ਪ੍ਰੀਫੈਕਚਰ ਅਤੇ ਆਸਪਾਸ ਦੇ ਖੇਤਰਾਂ ਨੂੰ ਪ੍ਰਭਾਵਿਤ ਕਰਨ ਵਾਲੇ ਲਗਭਗ 100 ਭੂਚਾਲਾਂ ਵਿੱਚੋਂ ਇੱਕ ਸੀ।
ਇਸ ਕੁਦਰਤੀ ਕਰੋਪੀ ਕਾਰਨ ਸਭ ਤੋਂ ਵੱਧ ਮੌਤਾਂ ਇਸ਼ੀਕਾਵਾ ਵਿੱਚ ਹੋਈਆਂ ਹਨ, ਜਦੋਂ ਕਿ ਘਰਾਂ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਹਾਲਾਂਕਿ ਨੁਕਸਾਨ ਦੀ ਮਾਤਰਾ ਦਾ ਅੰਦਾਜ਼ਾ ਨਹੀਂ ਲਗਾਇਆ ਜਾ ਸਕਿਆ ਹੈ। ਜਾਪਾਨੀ ਮੀਡੀਆ ਰਿਪੋਰਟਾਂ ਵਿਚ ਕਿਹਾ ਗਿਆ ਹੈ ਕਿ ਤੱਟਵਰਤੀ ਸ਼ਹਿਰਾਂ ਵਿਚ ਚਿੱਕੜ ਦਾ ਸੈਲਾਬ ਦੇਖਿਆ ਗਿਆ ਹੈ। ਸਰਕਾਰ ਦੇ ਬੁਲਾਰੇ ਯੋਸ਼ੀਮਾਸਾ ਹਯਾਸ਼ੀ ਨੇ ਕਿਹਾ ਕਿ ਕੁਝ ਇਲਾਕਿਆਂ ‘ਚ ਪਾਣੀ, ਬਿਜਲੀ ਅਤੇ ਸੈਲਫੋਨ ਸੇਵਾ ਅਜੇ ਵੀ ਬੰਦ ਹੈ।
ਸਾਹਮਣੇ ਆਈਆਂ ਕਈ ਵੀਡੀਓ ਵਿੱਚ ਢਹਿ-ਢੇਰੀ ਘਰਾਂ ਦੀਆਂ ਕਤਾਰਾਂ ਦੇਖੀਆਂ ਗਈਆਂ ਹਨ। ਕੁਝ ਲੱਕੜ ਦੇ ਢਾਂਚੇ ਸਮਤਲ ਹੋ ਗਏ ਅਤੇ ਵਾਹਨ ਵੀ ਉਲਟ ਗਏ ਸਨ। ਅੱਧ-ਡੁੱਬੇ ਜਹਾਜ਼ ਖਾੜੀਆਂ ਵਿੱਚ ਤੈਰ ਰਹੇ ਸਨ ਜਿੱਥੇ ਸੁਨਾਮੀ ਦੀਆਂ ਲਹਿਰਾਂ ਆਈਆਂ ਸਨ। ਹਾਈਵੇਅ ਦੇ ਕੁਝ ਹਿੱਸੇ ਅਜੇ ਵੀ ਬੰਦ ਹਨ। ਪ੍ਰਧਾਨ ਮੰਤਰੀ ਫੂਮਿਓ ਕਿਸ਼ਿਦਾ ਨੇ ਮੰਗਲਵਾਰ ਨੂੰ ਕਿਹਾ ਕਿ ਜਾਪਾਨ ਦੀ ਫੌਜ ਨੇ ਬਚਾਅ ਕਾਰਜਾਂ ਲਈ 1,000 ਸੈਨਿਕਾਂ ਨੂੰ ਤਬਾਹੀ ਵਾਲੇ ਖੇਤਰਾਂ ਵਿੱਚ ਭੇਜਿਆ ਹੈ।
