ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਹਾਲ ਹੀ ਵਿੱਚ ਗੋਲਡ ਕਾਰਡ ਸਕੀਮ ਪੇਸ਼ ਕੀਤੀ ਸੀ, ਜਿਸ ਦੇ ਤਹਿਤ ਅਮਰੀਕਾ ਵਿੱਚ 5 ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰਨ ਵਾਲਿਆਂ ਨੂੰ ਸਥਾਈ ਨਿਵਾਸ ਅਤੇ ਵਿਕਲਪਿਕ ਨਾਗਰਿਕਤਾ ਦੀ ਪੇਸ਼ਕਸ਼ ਕੀਤੀ ਜਾਂਦੀ ਹੈ।ਲੱਗਦਾ ਹੈ ਕਿ ਟਰੰਪ ਦੀ ਇਹ ਨੀਤੀ ਬਹੁਤ ਵੱਡੀ ਹਿੱਟ ਹੋਣ ਵਾਲੀ ਹੈ। ਅਮਰੀਕੀ ਵਣਜ ਸਕੱਤਰ ਦੇ ਦਾਅਵਿਆਂ ਤੋਂ ਇਹੀ ਸੰਕੇਤ ਮਿਲਦਾ ਜਾਪਦਾ ਹੈ। ਦਰਅਸਲ ਅਮਰੀਕੀ ਵਣਜ ਸਕੱਤਰ ਹਾਵਰਡ ਲੂਟਨਿਕ ਨੇ ਦਾਅਵਾ ਕੀਤਾ ਹੈ ਕਿ ਅਮਰੀਕੀ ਸਰਕਾਰ ਨੇ ਇੱਕ ਦਿਨ ਵਿੱਚ 1000 ਗੋਲਡ ਕਾਰਡ ਵੇਚੇ ਹਨ।
ਅਧਿਕਾਰਤ ਐਲਾਨ ਜਲਦੀ ਹੀ ਕੀਤਾ ਜਾਵੇਗਾ
ਡੋਨਾਲਡ ਟਰੰਪ ਦੀ ਗੋਲਡ ਕਾਰਡ ਸਕੀਮ ਦਾ ਅਜੇ ਅਧਿਕਾਰਤ ਤੌਰ ‘ਤੇ ਐਲਾਨ ਨਹੀਂ ਕੀਤਾ ਗਿਆ ਹੈ। ਪਰ ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਸਨੂੰ ਅਗਲੇ ਦੋ ਹਫ਼ਤਿਆਂ ਵਿੱਚ ਅਧਿਕਾਰਤ ਤੌਰ ‘ਤੇ ਰੋਲ ਆਊਟ ਕਰ ਦਿੱਤਾ ਜਾਵੇਗਾ। ਲੂਟਨਿਕ ਨੇ ਕਿਹਾ ਕਿ ਐਲੋਨ ਮਸਕ ਇਸ ਲਈ ਸਾਫਟਵੇਅਰ ਤਿਆਰ ਕਰ ਰਿਹਾ ਹੈ।ਇੱਕ ਪੋਡਕਾਸਟ ਵਿੱਚ ਬੋਲਦਿਆਂ, ਲੂਟਨਿਕ ਨੇ ਦਾਅਵਾ ਕੀਤਾ ਕਿ ਬਹੁਤ ਸਾਰੇ ਲੋਕ ਗੋਲਡ ਸਕੀਮ ਦਾ ਲਾਭ ਲੈਣ ਲਈ ਕਤਾਰ ਵਿੱਚ ਖੜ੍ਹੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਇਹ ਸਕੀਮ ਅਜੇ ਸ਼ੁਰੂਆਤੀ ਪੜਾਅ ‘ਤੇ ਹੈ, ਪਰ ਫਿਰ ਵੀ ਮੈਂ ਕੱਲ੍ਹ 1000 ਗੋਲਡ ਕਾਰਡ ਵੇਚੇ ਹਨ।
ਅਮਰੀਕਾ ਲਈ ਵੱਡਾ ਬਦਲਾਅ
ਲੂਟਨਿਕ ਨੇ ਪੋਡਕਾਸਟ ਵਿੱਚ ਕਿਹਾ ਕਿ ਜੇ ਮੈਂ ਅਮਰੀਕੀ ਨਾਗਰਿਕ ਨਾ ਹੁੰਦਾ ਤਾਂ ਮੈਂ ਆਪਣੀ ਪਤਨੀ ਅਤੇ ਬੱਚਿਆਂ ਲਈ ਇੱਕ ਗੋਲਡ ਕਾਰਡ ਖਰੀਦਦਾ। ਜੇਕਰ ਕਦੇ ਦੇਸ਼ ਵਿੱਚ ਐਮਰਜੈਂਸੀ ਸਥਿਤੀ ਪੈਦਾ ਹੋਈ, ਤਾਂ ਮੈਂ ਸਿੱਧਾ ਅਮਰੀਕਾ ਆਵਾਂਗਾ।
