ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੈਨੇਜ਼ੁਏਲਾ ਦੇ ਡਰੱਗ ਤਸਕਰਾਂ ਨੂੰ ਵੱਡੀ ਚਿਤਾਵਨੀ ਦਿੱਤੀ ਹੈ।ਕੈਰੇਬੀਅਨ ਵਿੱਚ ਕਥਿਤ ਵੈਨੇਜ਼ੁਏਲਾ ਦੇ ਡਰੱਗ ਤਸਕਰਾਂ ਦੀਆਂ ਕਿਸ਼ਤੀਆਂ ‘ਤੇ ਵਾਰ-ਵਾਰ ਹਵਾਈ ਹਮਲਿਆਂ ਤੋਂ ਬਾਅਦ, ਟਰੰਪ ਨੇ ਕਿਹਾ ਕਿ ਅਮਰੀਕਾ ਬਹੁਤ ਜਲਦ ਵੈਨੇਜ਼ੁਏਲਾ ਦੇ ਅੰਦਰ ਰਹਿਣ ਵਾਲੇ ਡਰੱਗ ਤਸਕਰਾਂ ‘ਤੇ ਹਮਲਾ ਕਰਨਾ ਸ਼ੁਰੂ ਕਰ ਦੇਵੇਗਾਦਰਅਸਲ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਮੰਗਲਵਾਰ ਦੀ ਕੈਬਨਿਟ ਮੀਟਿੰਗ ਦੌਰਾਨ ਜੋ ਟਿੱਪਣੀ ਕੀਤੀ, ਉਸ ਨਾਲ ਵਾਸ਼ਿੰਗਟਨ ਅਤੇ ਕਰਾਕਸ (ਵੈਨੇਜ਼ੁਏਲਾ) ਦੋਵਾਂ ਦੇਸ਼ਾਂ ਵਿਚਾਲੇ ਤਣਾਅ ਹੋਰ ਵਧਣ ਦੀ ਸੰਭਾਵਨਾ ਹੈ।
ਜ਼ਮੀਨ ‘ਤੇ ਹਮਲੇ ਕਰਨ ਜਾ ਰਹੇ
ਵੈਨੇਜ਼ੁਏਲਾ ਵਿੱਚ ਡਰੱਗ ਤਸਕਰਾਂ ਦੀਆਂ ਕਿਸ਼ਤੀਆਂ ‘ਤੇ ਵਾਰ-ਵਾਰ ਹਮਲਾ ਕਰਨ ਤੋਂ ਬਾਅਦ ਅਮਰੀਕਾ ਨੇ ਇੱਕ ਹੋਰ ਵੱਡਾ ਫੈਸਲਾ ਲਿਆ ਹੈ। ਟਰੰਪ ਨੇ ਕੈਬਨਿਟ ਮੀਟਿੰਗ ਦੌਰਾਨ ਕਿਹਾ, “ਅਸੀਂ ਜ਼ਮੀਨ ‘ਤੇ ਵੀ ਇਹ ਹਮਲੇ ਸ਼ੁਰੂ ਕਰਨ ਜਾ ਰਹੇ ਹਾਂ। ਜ਼ਮੀਨ ‘ਤੇ ਹਮਲਾ ਕਰਨਾ ਬਹੁਤ ਆਸਾਨ ਹੈ, ਅਸੀਂ ਜਾਣਦੇ ਹਾਂ ਕਿ ਬੁਰੇ ਲੋਕ ਕਿੱਥੇ ਰਹਿੰਦੇ ਹਨ। ਅਸੀਂ ਬਹੁਤ ਜਲਦ ਉਨ੍ਹਾਂ ‘ਤੇ ਹਮਲੇ ਸ਼ੁਰੂ ਕਰਨ ਜਾ ਰਹੇ ਹਾਂ।”
ਹੁਣ ਤੱਕ 80 ਤੋਂ ਵੱਧ ਲੋਕ ਮਾਰੇ ਗਏ
ਜ਼ਿਕਰਯੋਗ ਹੈ ਕਿ ਟਰੰਪ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਉਨ੍ਹਾਂ ਦੇ ਪ੍ਰਸ਼ਾਸਨ ‘ਤੇ ਕਥਿਤ ਡਰੱਗ-ਤਸਕਰੀ ਵਾਲੀਆਂ ਕਿਸ਼ਤੀਆਂ ਨੂੰ ਨਿਸ਼ਾਨਾ ਬਣਾਉਣ ਦੇ ਹਮਲੇ ਲਈ ਸਖ਼ਤ ਜਾਂਚ ਹੋਈ, ਜਿਸ ਵਿੱਚ ਹੁਣ ਤੱਕ 80 ਤੋਂ ਵੱਧ ਲੋਕ ਮਾਰੇ ਗਏ ਹਨ। ਟਰੰਪ ਨੇ ਵਾਰ ਸੈਕਟਰੀ (War Secretary) ਪੀਟ ਹੈਗਸੇਥ ਦਾ ਬਚਾਅ ਕੀਤਾ ਅਤੇ ਕਿਹਾ ਕਿ ਨਾ ਤਾਂ ਉਨ੍ਹਾਂ ਨੂੰ ਅਤੇ ਨਾ ਹੀ ਵਾਰ ਸੈਕਟਰੀ ਨੂੰ ਸ਼ੱਕੀ ਡਰੱਗ ਜਹਾਜ਼ ‘ਤੇ ਦੂਜੇ ਹਮਲੇ ਬਾਰੇ ਪਤਾ ਸੀ।
ਮੈਨੂੰ ਦੂਜੇ ਹਮਲੇ ਬਾਰੇ ਨਹੀਂ ਪਤਾ
ਯੂਐਸ ਮਿਲਟਰੀ ਨੇ 2 ਸਤੰਬਰ ਨੂੰ ਕੈਰੇਬੀਅਨ ਵਿੱਚ ਚੱਲ ਰਹੇ ਇੱਕ ਸ਼ੱਕੀ ਡਰੱਗ ਜਹਾਜ਼ ‘ਤੇ ਇੱਕ ਹੋਰ ਹਮਲਾ ਕੀਤਾ ਸੀ, ਜਦੋਂ ਸ਼ੁਰੂਆਤੀ ਹਮਲੇ ਵਿੱਚ ਜਹਾਜ਼ ‘ਤੇ ਸਵਾਰ ਸਾਰੇ ਲੋਕ ਨਹੀਂ ਮਾਰੇ ਗਏ ਸਨ। ਟਰੰਪ ਨੇ ਕਿਹਾ, “ਮੈਨੂੰ ਦੂਜੇ ਹਮਲੇ ਬਾਰੇ ਨਹੀਂ ਪਤਾ ਸੀ। ਮੈਨੂੰ ਲੋਕਾਂ ਬਾਰੇ ਕੁਝ ਨਹੀਂ ਪਤਾ ਸੀ। ਮੈਂ ਇਸ ਵਿੱਚ ਸ਼ਾਮਲ ਨਹੀਂ ਸੀ ਅਤੇ ਮੈਨੂੰ ਪਤਾ ਸੀ ਕਿ ਉਨ੍ਹਾਂ ਨੇ ਇੱਕ ਕਿਸ਼ਤੀ ਨੂੰ ਉਡਾ ਦਿੱਤਾ ਸੀ, ਪਰ ਮੈਂ ਇਹ ਕਹਾਂਗਾ ਕਿ ਉਨ੍ਹਾਂ ਨੇ ਹਮਲਾ ਕੀਤਾ ਸੀ।”
ਰਾਸ਼ਟਰਪਤੀ ਨੇ ਕਿਹਾ ਕਿ ਹੈਗਸੇਥ ਪਹਿਲੇ ਹਮਲੇ ਤੋਂ ਸੰਤੁਸ਼ਟ ਸਨ, ਪਰ ਦੋ ਲੋਕਾਂ ਨਾਲ ਜੁੜੇ ਦੂਜੇ ਹਮਲੇ ਬਾਰੇ ਨਹੀਂ ਜਾਣਦੇ ਸਨ। ਉੱਥੇ ਹੀ, ਵਾਰ ਸੈਕਟਰੀ ਪੀਟ ਹੈਗਸੇਥ ਨੇ ਕਿਹਾ ਕਿ ਉਨ੍ਹਾਂ ਨੇ ਪਹਿਲਾ ਹਮਲਾ ਲਾਈਵ ਦੇਖਿਆ ਸੀ, ਪਰ ਫਿਰ ਉਹ ਆਪਣੀ ਅਗਲੀ ਮੀਟਿੰਗ ਵਿੱਚ ਚਲੇ ਗਏ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੂੰ ਦੂਜੇ ਹਮਲੇ ਬਾਰੇ ਕੁਝ ਘੰਟਿਆਂ ਬਾਅਦ ਪਤਾ ਲੱਗਾ। ਉਨ੍ਹਾਂ ਕਿਹਾ, “ਮੈਂ ਖੁਦ ਕਿਸੇ ਨੂੰ ਜਿੰਦਾ ਨਹੀਂ ਦੇਖਿਆ ਕਿਉਂਕਿ ਉਸ ਚੀਜ਼ ਨੂੰ ਅੱਗ ਲੱਗੀ ਹੋਈ ਸੀ। ਇਸ ਨੂੰ ‘ਫੌਗ ਆਫ ਵਾਰ’ ਕਹਿੰਦੇ ਹਨ।” (ਸਮਾਚਾਰ ਏਜੰਸੀ ਏਐਨਆਈ ਦੇ ਇਨਪੁਟ ਨਾਲ)
