ਵਿਕਟੋਰੀਆ ਪੁਲਿਸ ਨੇ ਮੈਲਬੋਰਨ ਦੇ ਇੱਕ ਗੁਰੂਦੁਆਰਾ ਸਾਹਿਬ ਵਿੱਚ ਹੋਈ ਚੋਰੀ ਦੇ ਮਾਮਲੇ ਵਿੱਚ CCTV ਫੁਟੇਜ ਜਾਰੀ ਕਰ ਦਿੱਤੀ ਹੈ ਅਤੇ ਜਨਤਾ ਤੋਂ ਮਦਦ ਦੀ ਅਪੀਲ ਕੀਤੀ ਹੈ।
ਪੁਲਿਸ ਮੁਤਾਬਕ, 29 ਦਸੰਬਰ ਦੀ ਰਾਤ ਲਗਭਗ 10:30 ਵਜੇ, ਦੋ ਨਕਾਬਪੋਸ਼ ਵਿਅਕਤੀ Campbellfield ਦੇ Malcolm Place ਸਥਿਤ Shri Guru Ravidass Sabha Australia ਗੁਰੂਦੁਆਰਾ ਸਾਹਿਬ ਵਿੱਚ ਦਾਖ਼ਲ ਹੋਏ।
CCTV ਵਿੱਚ ਦਿਖਾਈ ਦਿੰਦਾ ਹੈ ਕਿ ਦੋਵੇਂ ਆਰੋਪੀ angle grinder ਦੀ ਮਦਦ ਨਾਲ ਗੁਰੂਦੁਆਰਾ ਸਾਹਿਬ ਦਾ ਤਾਲਾ ਕੱਟ ਕੇ ਅੰਦਰ ਵੜੇ। ਇਸ ਤੋਂ ਬਾਅਦ ਉਹ ਗੁਰੂਦੁਆਰਾ ਸਾਹਿਬ ਦੇ ਅੰਦਰ ਸਥਿਤ ਸ਼ਰਾਈਨ (ਪਵਿੱਤਰ ਸਥਾਨ) ਵੱਲ ਗਏ, ਜਿੱਥੋਂ ਉਹ ਗੋਲਕ (ਦਾਨ ਪੇਟੀ) ਕੱਢ ਕੇ ਲੈ ਗਏ।
ਵਿਕਟੋਰੀਆ ਪੁਲਿਸ ਦੇ ਅਨੁਸਾਰ, ਚੋਰਾਂ ਨੇ ਕਰੀਬ 1500 ਡਾਲਰ ਨਕਦ ਚੋਰੀ ਕੀਤੇ।
ਇਸ ਘਟਨਾ ਤੋਂ ਬਾਅਦ ਸਥਾਨਕ ਸਿੱਖ ਭਾਈਚਾਰੇ ਵਿੱਚ ਚਿੰਤਾ ਅਤੇ ਨਾਰਾਜ਼ਗੀ ਦਾ ਮਾਹੌਲ ਹੈ। ਪੁਲਿਸ ਨੇ ਕਿਹਾ ਹੈ ਕਿ ਇਹ ਮਾਮਲਾ ਗੰਭੀਰਤਾ ਨਾਲ ਜਾਂਚਿਆ ਜਾ ਰਿਹਾ ਹੈ ਅਤੇ ਜਿਨ੍ਹਾਂ ਲੋਕਾਂ ਕੋਲ ਇਸ ਘਟਨਾ ਨਾਲ ਸਬੰਧਤ ਕੋਈ ਜਾਣਕਾਰੀ ਹੈ, ਉਹ ਅੱਗੇ ਆਉਣ।
ਵਿਕਟੋਰੀਆ ਪੁਲਿਸ ਨੇ ਜਨਤਾ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੇ ਉਸ ਰਾਤ ਦੇ ਸਮੇਂ ਇਲਾਕੇ ਵਿੱਚ ਕੋਈ ਸ਼ੱਕੀ ਗਤੀਵਿਧੀ ਦੇਖੀ ਹੋਵੇ ਜਾਂ CCTV ਫੁਟੇਜ ਵਿੱਚ ਦਿਖ ਰਹੇ ਵਿਅਕਤੀਆਂ ਬਾਰੇ ਜਾਣਕਾਰੀ ਹੋਵੇ, ਤਾਂ ਉਹ ਪੁਲਿਸ ਨਾਲ ਸੰਪਰਕ ਕਰਨ।
ਇਹ ਘਟਨਾ ਧਾਰਮਿਕ ਸਥਾਨਾਂ ਦੀ ਸੁਰੱਖਿਆ ਅਤੇ ਆਦਰ ਸਬੰਧੀ ਇੱਕ ਵੱਡੇ ਸਵਾਲ ਖੜੇ ਕਰਦੀ ਹੈ।
