ਆਸਟ੍ਰੇਲੀਆ ਕੋਲ ਰਿਹ ਗਿਆ ਸਿਰਫ਼ ਇੱਕ ਮਹੀਨੇ ਦਾ ਤੇਲ ਬਾਕੀ…

ਆਸਟ੍ਰੇਲੀਆ ਵਿੱਚ ਈਂਧਨ ਯਾਨੀ fuel ਦਾ ਇੱਕ ਬਹੁਤ ਵੱਡਾ ਸੰਕਟ ਖੜ੍ਹਾ ਹੋ ਗਿਆ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਦੇਸ਼ ਵਿੱਚ ਹੁਣ ਇੱਕ ਮਹੀਨੇ ਤੋਂ ਵੀ ਘੱਟ ਸਮੇਂ ਦਾ ਪੈਟਰੋਲ, ਡੀਜ਼ਲ ਅਤੇ ਜਹਾਜ਼ਾਂ ਵਾਲਾ ਤੇਲ (jet fuel) ਬਾਕੀ ਬਚਿਆ ਹੈ।

Last Drop ਨਾਂ ਦੀ ਇੱਕ ਨਵੀਂ ਐਪ ਨੇ ਸਰਕਾਰੀ ਅੰਕੜਿਆਂ ਦੀ ਪੋਲ ਖੋਲ੍ਹ ਦਿੱਤੀ ਹੈ। ਇਸ ਲਾਈਵ ਐਪ ਮੁਤਾਬਕ, ਇਸ ਵੇਲੇ ਸਾਡੇ ਕੋਲ ਸਿਰਫ਼ 28 ਦਿਨਾਂ ਦਾ ਪੈਟਰੋਲ, 25 ਦਿਨਾਂ ਦਾ ਡੀਜ਼ਲ ਅਤੇ 23 ਦਿਨਾਂ ਦਾ ਜੈੱਟ ਫਿਊਲ ਬਾਕੀ ਹੈ। ਇਸ ਐਪ ਰਾਹੀਂ ਆਮ ਲੋਕ ਵੀ ਆਸਟ੍ਰੇਲੀਆ ਆ ਰਹੇ ਤੇਲ ਵਾਲੇ ਜਹਾਜ਼ਾਂ ਦੀ ਲਾਈਵ ਲੋਕੇਸ਼ਨ ਦੇਖ ਸਕਦੇ ਹਨ।

ਇਸੇ ਖ਼ਤਰੇ ਨੂੰ ਦੇਖਦਿਆਂ, ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਅੱਜ ਸਿੰਗਾਪੁਰ ਵਿੱਚ ਅਹਿਮ ਮੀਟਿੰਗਾਂ ਕਰ ਰਹੇ ਹਨ, ਤਾਂ ਜੋ ਆਸਟ੍ਰੇਲੀਆ ਲਈ ਤੇਲ ਦੀ ਸਪਲਾਈ ਯਕੀਨੀ ਬਣਾਈ ਜਾ ਸਕੇ। ਚੇਤਾਵਨੀ ਦਿੱਤੀ ਗਈ ਹੈ ਕਿ ਜੇਕਰ ਹਾਲਾਤ ਨਾ ਸੁਧਰੇ, ਤਾਂ ਮਈ ਮਹੀਨੇ ਤੱਕ ਦੇਸ਼ ਵਿੱਚ ਤੇਲ ਦੀ ਰਾਸ਼ਨਿੰਗ (rationing) ਕਰਨੀ ਪੈ ਸਕਦੀ ਹੈ।

ਸਭ ਤੋਂ ਵੱਡੀ ਕਮਜ਼ੋਰੀ ਇਹ ਹੈ ਕਿ ਆਸਟ੍ਰੇਲੀਆ ਕੋਲ ਆਪਣਾ ਕੱਚਾ ਤੇਲ ਸਾਫ਼ ਕਰਨ (refinery) ਦੀ ਪੂਰੀ ਸਮਰੱਥਾ ਨਹੀਂ ਹੈ। ਅਸੀਂ ਆਪਣੇ ਤੇਲ ਲਈ ਪੂਰੀ ਤਰ੍ਹਾਂ ਏਸ਼ੀਆ ‘ਤੇ ਨਿਰਭਰ ਕਰਦੇ ਹਾਂ—ਸਾਡਾ 50% ਤੇਲ ਇਕੱਲੇ ਸਿੰਗਾਪੁਰ ਤੋਂ ਆਉਂਦਾ ਹੈ, ਅਤੇ 20% ਮਲੇਸ਼ੀਆ ਅਤੇ ਸਾਊਥ ਕੋਰੀਆ ਤੋਂ।

ਸਪਲਾਈ ਚੇਨ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਗਲੋਬਲ ਮਾਰਕੀਟ ਵਿੱਚ ਤੇਲ ਉਸੇ ਨੂੰ ਮਿਲਦਾ ਹੈ ਜੋ ਸਭ ਤੋਂ ਵੱਧ ਪੈਸਾ ਦਿੰਦਾ ਹੈ। ਆਸਟ੍ਰੇਲੀਆ ਦੁਨੀਆ ਦੇ ਸਭ ਤੋਂ ਵੱਧ ਪ੍ਰਭਾਵਿਤ ਹੋਣ ਵਾਲੇ ਦੇਸ਼ਾਂ ਵਿੱਚੋਂ ਇੱਕ ਹੈ। ਮਾਹਿਰਾਂ ਮੁਤਾਬਕ, ਆਉਣ ਵਾਲੇ ਕੁਝ ਹਫ਼ਤਿਆਂ ਵਿੱਚ ਸਾਨੂੰ ਇਸ ਸੰਕਟ ਦਾ ਅਸਲ ਅਸਰ ਅਤੇ ਵੱਧਦੀਆਂ ਕੀਮਤਾਂ ਦੇਖਣ ਨੂੰ ਮਿਲ ਸਕਦੀਆਂ ਹਨ।