ਮੱਧ ਪੂਰਬ (Middle East) ਵਿੱਚ ਚੱਲ ਰਹੇ ਤਣਾਅ ਕਾਰਨ ਲਗਾਤਾਰ ਵੱਧ ਰਹੀਆਂ ਤੇਲ ਦੀਆਂ ਕੀਮਤਾਂ ਨੂੰ ਦੇਖਦਿਆਂ, ਮਸ਼ਹੂਰ ਰਾਈਡ-ਸ਼ੇਅਰ ਕੰਪਨੀ ਊਬਰ (Uber) ਨੇ ਆਸਟ੍ਰੇਲੀਆ ਵਿੱਚ ਆਪਣੀਆਂ ਰਾਈਡਜ਼ ‘ਤੇ ‘ਫਿਊਲ ਸਰਚਾਰਜ’ ਲਗਾਉਣ ਦਾ ਐਲਾਨ ਕੀਤਾ ਹੈ।
ਗਾਹਕਾਂ ਨੂੰ ਹੁਣ ਆਪਣੀ ਹਰ ਰਾਈਡ ‘ਤੇ 5 ਸੈਂਟ ਪ੍ਰਤੀ ਕਿਲੋਮੀਟਰ (5c per km) ਵਾਧੂ ਦੇਣੇ ਪੈਣਗੇ। ਹਾਲਾਂਕਿ, ਜੇਕਰ ਤੁਸੀਂ ਇਲੈਕਟ੍ਰਿਕ ਗੱਡੀਆਂ (electric vehicles) ਵਿੱਚ ਸਫ਼ਰ ਕਰ ਰਹੇ ਹੋ, ਤਾਂ ਇਹ ਸਰਚਾਰਜ ਲਾਗੂ ਨਹੀਂ ਹੋਵੇਗਾ। ਇਹ ਵਾਧੂ ਫੀਸ ਕੱਲ੍ਹ ਯਾਨੀ 15 ਅਪ੍ਰੈਲ ਤੋਂ ਸ਼ੁਰੂ ਹੋਵੇਗੀ ਅਤੇ 8 ਜੂਨ ਤੱਕ ਜਾਰੀ ਰਹੇਗੀ। ਊਬਰ ਅਤੇ ਟਰਾਂਸਪੋਰਟ ਵਰਕਰਜ਼ ਯੂਨੀਅਨ (TWU) ਨੇ ਸਾਂਝਾ ਬਿਆਨ ਜਾਰੀ ਕਰਕੇ ਸਪੱਸ਼ਟ ਕੀਤਾ ਹੈ ਕਿ ਇਸ ਸਰਚਾਰਜ ਤੋਂ ਇਕੱਠਾ ਹੋਣ ਵਾਲਾ ਸਾਰਾ ਪੈਸਾ ਸਿੱਧਾ ਡਰਾਈਵਰਾਂ ਦੀ ਜੇਬ ਵਿੱਚ ਜਾਵੇਗਾ ਤਾਂ ਜੋ ਉਨ੍ਹਾਂ ਨੂੰ ਮਹਿੰਗੇ ਤੇਲ ਤੋਂ ਕੁਝ ਰਾਹਤ ਮਿਲ ਸਕੇ। ਜ਼ਿਕਰਯੋਗ ਹੈ ਕਿ ਪਿਛਲੇ ਮਹੀਨੇ ਇੱਕ ਹੋਰ ਰਾਈਡ-ਸ਼ੇਅਰ ਕੰਪਨੀ, ਦੀਦੀ (DiDi) ਨੇ ਵੀ ਡਰਾਈਵਰਾਂ ਦੇ ਆਰਥਿਕ ਬੋਝ ਨੂੰ ਘਟਾਉਣ ਲਈ ਆਪਣਾ ਫਿਊਲ ਸਰਚਾਰਜ ਵਧਾ ਕੇ 5 ਸੈਂਟ ਪ੍ਰਤੀ ਕਿਲੋਮੀਟਰ ਕਰ ਦਿੱਤਾ ਸੀ।
